Pilason ang isa ka tag-iya sang ukay-ukay matapos ginbuno sang abyan sini nga nagapataya sang Small Town Lottery (STL) sa Purok 6, Brgy 1, Kabankalan City, Negros Occidental sang Martes, Oktubre 1.
Sa interview sang Bombo Radyo Bacolod kay Police Captain Sammy Gasataya, Deputy Chief of Police sang Kabankalan City Police Station, kilalahay man ang biktima nga si Rolan Madalag, 51 anyos, tag-iya sang Ukay-Ukay kag residente sang Sitio Utod, Brgy Hilamonan, Kabankalan City, Negros Occidental kag ang suspetsado nga James Terre, 39 anyos, nagapataya sang STL kag residente sang Phase 5, Brgy 1, Kabakalan City.
Suno kay Gasataya, ang biktima ang tuman ka sunluganon nga klase tawo gani ginalantaw sang mga ini nga nagsupot na ang kaakig sang suspek.
Gani sang Martes sang Nakita ni Terre si Madalag hinali niya nalang ini nga ginbuno sa magkatuhay nga bahin sang lawas sini.
Wala naman nakaagom sang patal nga pilas ang biktima gani establa na ang kondisyon sini sa Kabankalan City District Hospital.
Samtang suspetsado naman ang natigayon nga madakpan kasunod ang ginpatigayon nga hot pursuit operation sang mga kapulisan kag nakahunong na sa Kabankalan City Police Station.
Sa karun suno kay Gasataya ginapreparar na sang mga ini ang mga papeles agud nga mapatranscribe sa Fiscal Office kag mapasaka ang kaso nga frustrated murder batok sa suspetsado.
