Ginkompirmar sang pinuno sang Disaster Risk Reduction and Management Office (DRRMO) sang La Castellana nga may yara sang abo sang gincremate nga bangkay sa Negros Oriental nga ginpauli sa amo nga banwa.
Sa interview sang Bombo Radyo Bacolod kay John BF De Asis, ginpahayag sini nga ginsunod lamang sang ospital sa Dumaguete City, Negros Oriental ang angot sa mga nagtaliwan nga may kaangtanan sa coronavirus disease 2019 (COVID-19) gani gincremate ang bangkay sa sulod sang dose oras sang nagtaliwan ang pasyente.
Luyag naman nga dal-on sang pamilya sini ang abo sa La Castellana gani gintabo na lamang sang himata sini sa border agud madala pauli.
Suno diri, ang nagtaliwan ang nagapuyo sa La Castellana apang nagaubra ini sa Dumaguete kag suno sa impormasyon nga nakuha sini, madugay na niya nga ginabatyag ang problema sa baga apang ginadala-dala niya lamang ini.
Nakuhaan naman ini sang swab sample kag wala ini nakabaton sang opisyal nga report apang suno sa pamilya sang pasyente, nagnegatibo na ang resulta sini.
Nagpatigayon naman sang information drive ang team sini agud indi magpanic ang mga residente.
Nagpanugyan man ini sa mga pumuluyo nga sundon ang tanan nga health protocols kag magpabilin sa balay kun wala man lang sang kadtuan nga importante.
Sa karun, wala na sang kompirmado sang COVID-19 sa banwa sang La Castellana, Negros Occidental.
