Gintindugan sang tagpamaba ni Bacolod City Lone District Congressman Alfredo “Albee” Benitez nga political harrasment lamang ang ginfile nga complaint sa Office of the Ombudsman angot sa P2.1 billion Build-Transfer-Maintain (BTM) Agreement sang Bacolod City Government kag Highdata Infra Corporation.
Ang complaint ang ginfile sang nagtaliwan na nga blocktimer nga si Rolando Baliguat sang alkalde pa si Benitez kasubong man ang mayorya sa mga konsehal sa iya administrasyon.
Sa interview sang Bombo Radyo Bacolod kay Bacolod City Councilor Atty Caesar Distrito, kapin duha ka tuig man ang ginlawig sang evaluation agud maseguro nga wala sang problema.
Suno diri, naglabay sa bidding process kag tanan ang sarang makapartisipar apang ang Highdata Infra Corporation ang nakakuha sang kontrata.
Ang kontrata ang naglabay man sa PPP Center sang National Government kag sa City Legal Office sang Bacolod City Government.
Suno diri, napulo ka tuig ang kontrata sa purpose nga mahimo na nga digitalized ang tanan nga ahensya kag opisina sang gobyerno paagi sa Centralized Command Center, makabutang sang intelligent street lighting nga may surveillance analytics, kag mapasanyog ang tax mapping kag GIS systems.
Ini ang isa sa mga programa sa idalom sang tinutuyo nga mahimo Super City ang Bacolod.
Panindugan ni Distrito nga valid kag legal ang proseso sa pagsulod sa nasambitan nga partnership, kag purely political harrassment gid lamang ang ginfile nga complaint gani nagapati ini nga idismiss sang Ombudsman ang kaso.
