Ginkumpirmar sang tagpamaba sang 3rd Infantry Division sang Philippine Army nga wala pa sang suldado nga nabakunahan sa idalom sang ila nga hanay.
Madumduman nga ginpahayag ni Presidente Rodrigo Duterte nga nahatagan na sang COVID-19 vaccine nga himo sang Sinopharm nagikan sa China ang pila ka mga military personnel.
Gin-athag sang Armed Forces of the Philippines (AFP) nga ang mga miyembro sang Presidential Security Group (PSG) ang una nga mga military personnel nga nabakunahan batok sa coronavirus.
Sa interview sang Bombo Radyo Bacolod kay Army Major Cenon Pancito III, ginpahayag sini nga wala pa sang suldado sa idalom sang ila unit ukon bisan abiso nga magapabakuna na sila.
Suno sa iya, posible nga gin-una ang mga miyembro sang PSG bangud kabahin sila sang security detail sang presidente.
Gin-athag naman sini nga ang bakuna nagikan sa China nga gintublok sa PSG members ang donasyon lamang kag wala ginbakal.
Suno kay Pancito, pananglitan nga may yara na sang available nga bakuna, bisan for trial lang ukon commercial man, handa ini nga mag-avail kag mag-volunteer nga magpatublok.
Suno sa tagpamaba, welcome development para sa iya ang ano man nga mga butang nga makabulig batok sa COVID-19 bangud nga yara sa risgo ang ila nga kabuhi bangud nga nagakadto sila sa nagkalain-lain nga mga lugar.
Suno kay Pancito, indi niya luyag nga mabutang sa risgo ang mga tawo sa palibot niya ilabi na ang iya nga pamilya.
