Gin-athag sang tagpamaba sang Bacolod City Police Office nga gin-augment anay sa mga dalanon ang pila ka mga personnel sang special weapons and tactics (SWAT) agud magbulig implementar sang mga health protocols.
Nahibaluan nga pila ka mga pumuluyo ang natingala kun ngaa may yara sang ginpahamtang nga mga personnel sang SWAT sa dalanon sa ciudad ilabi na sa dalan Lacson.
Sa interview sang Bombo Radyo Bacolod kay BCPO spokesperson P/Lt. Col. Ariel Pico, ginpahayag sini nga gin-utilize ang SWAT team agud magbulig anay patuman sang mga health protocols.
Suno pa kay Pico, wala man sang dako gid nga insidente nga gina-respondehan karon ang SWAT gani nga mas ginpakamaayo nga I-augment sila anay sa dalanon.
Dugang pa sang tagpamaba nga ginakulang gid karon ang mga police personnel bangud nga kalabanan sa mga ini ang nagabantay sa inner kag outer border control check up point kag ginhimo nga mga contact tracers kag may yara man nga ginbutang bilang taga-bantay sa mga quarantine facilities.
Ginkumpirmar man ni Pico nga may yara sila sang ginapatigayon nga spot inspection kun sa diin random lang ini ginapatigayon agud matsekyar kun bala ang mga nagasulod sa ciudad ang mga essential workers lamang kag may yara sang importante nga buluhaton.
