Ginakasubo sang tagpamaba sang Bacolod City Police Office (BCPO) nga nagnubo ang naga-apply nga mga firecracker manufacturers kag retailers para sa permit subong nga tuig.
Sa interview sang Bombo Radyo Bacolod kay Police Lt. Col. Ariel Pico, sang 2018 may yara sang 20 ka manufacturer nga nag-apply; sang 2019 may yara sang napulo; kag subong nga tuig may yara nalang sang apat nga nag-apply samtang ang mga retailers naman nga may 30 sang tinalikdan nga tuig apang sa karun 20 nalang.
Wala pa man ini nakahibalo sa karun kun may yara sang nagdugang nga nag-apply.
Suno diri, ginatsekyar na nila sa BCPO ang mga requirements sang nag-apply agud pag-abot sa regional office padayon nalang ang ila pagproseso agud indi na sila magbalik-balik ilabi nagid sa karun nga mabudlay ang travel.
Gin-athag man sini nga wala pa sila sang signal kun san o mahimo nga mag-umpisa sa pagbaligya sa Pope John Paul Tower sang mga palupok.
Suno kay Pico, sa Pope John Paul Tower lang mahimo makabaligya kag wala na sang tyangge nga makabaligya bangud ginadumilian na ini sang layi.
Ginpahayag man sini nga ang mga requirements sa pag-apply agud makakuha sang permit ang mga firecrackers kag manufacturers ang pareho lang kag wala sang nagdugang.
Suno sa iya, nagnubo ang mga nag-apply bangud may yara sang total ban sa paghimo kag pagbakal sang firecrackers sa madason nga tuig.
Wala man sang gin-isyuhan sang transport permit sa mga manufacturers kag retailers bangud ginadumili naman ini.
Nagpanugyan man ini nga wala sang may magbaligya sang palupok sa tiyangge bangud sa tion nga madakpan sang otoridad may yara sang multa nga P20 mil tubtob 30 mil kag pagpapriso nga anum tubtob isa ka tuig kag makompromiso man ang ila nga business permit.
Samtang, ginpahayag man sang tagpamaba sang BCPO nga nakahibalo na ang mga pumuluyo sa gindumilian nga mga palupok kag nakahibalo man sila sang selyo nga original komparar sa ginsunod lang bangud sang ila palatandaan.
Nagpanugyan man ini nga mangin responsible nga manugbaligya sang palupok kasubong man sa mga ginikanan nga mangin responsible man bangud indi maayo nga eksperyensya nga mautdan sang kamot ang mga kabataan bangud sa palupok samtang nagasugata sa bag-ong tuig.
