Nagapanawagan ang spokesperson sang Negros Electric and Power Corp. (NEPC) sa mga pumuluyo nga likawan ang pagyawyaw sang mga engineer kag line men nga nagatrabaho agud nga mapabalik ang connection sang kuryente.
Ini kasunod sang pagluntad sang brownout matapos nga nagcollapse ang power transformer nga nagresulta sang masobra 24 oras nga power outage sa coverage area sang Alijis Substation.
Miyerkules sang gab-i nag-umpisa ang blackout kun sa diin apektado ang pito ka mga Feeders nga konektado sa Alijis Substation kag nagdangat sa 47 mil nga mga consumers ang apektado.
Sa interview sang Bombo Radyo Bacolod kay Jonathan Cabrera, naintindihan sini nga nakatuga sang inconvenience sa mga kunsomidor ang nagluntad nga brownout apang nagalaom ini nga sila ang mahangpan man sang mga ini.
Suno kay Cabrera, nagaayo ini sa mga pumuluyo nga kun mahimo likawan nalang ang paghaboy sang indi maayo nga tinaga sa mga empleyado sang NEPC bangud tawo ang mga ini nga nasakitan kag may mga pamilya man ang mga ini nga makabasa ukon makabati kag maapektuhan.
Ginpahayag sini nga sila sa NEPC ang nagahimo gid sang tikang agud nga mahatagan sang solusyon ang mga problema sa kuryente sa ciudad sang Bacolod.
Nagaayo man ini nga indi man magbuya sang indi maayo nga tinaga kun madugayan antes masabat sa tion nga magtawag sa hotline bangud linibo ang nagatawag diri.
