Nagpahanumdom ang tagpamaba sang Police Regional Office 6 sa tanan nga luyag nga magsulod sa Philippine National Police, ini kasunod sang pagkadakop sang ginatudlo nga suspek sa recruitement sa scam sa banwa sang La Castellana, Negros Occidental.
Madumduman nga gin-aresto paagi sa joint operation sang mga kapulisan si Mary June Delos Santos.
Siya ang ginatudlo sa recruitement scam kun sa diin ginpabayad sini sang P250,000.00 ang mga indibidwal agud nga madasig sa PNP bisan wala sang tinapusan.
Kadam-an sa mga biktima ang nagpamaligya pa sang mga kasapatan kag duta agud lamang nga may ibayad kay Delos Santos agud nga madasig makasulod sa PNP.
Sa interview sang Bombo Radyo Bacolod kay Police Lt Col. Arnel Solis, sa mga luyag nga magsulod sa PNP dapat 4 year course graduate, may eligibility ukon nakapasar sa licensure exam kag nakapasar sa medical.
Suno kay Solis, wala man sang nakasaad sa requirements sang mga maga-apply sa ahensya nga kinahanglan nga magbayad sang dako nga kantidad agud makasulod sa PNP.
Ginpahayag man sini nga ang isa ka tawo nga may ginhimo nga illegal ang mahimo nga makapanago apang indi mientras tanto kag ini ang malab-ot sang kamot sang layi kag manabat sang iya hinimuan.
