Padayon pa ang pagpanagtag sang cash grant sa mga waitlisted nga beneficiaries sang emergency subsidy program sa idalom sang Bayanihan 2 ukon Bayanihan to Recover as One Act.
Ang nasambit nga mga benepisyaryo ang kwalipikado nga magbaton sang cash aid apang wala sila nalakip sa mga nahatagan sa 1st tranche kag 2nd tranche sang SAP.
Sa interview sang Bombo Radyo Bacolod kay Department of Social Services and Development head Pacita Tero, tubtob bwas ang payout para sa masobra 1,500 ka mga beneficiaries nga naupload na ang payroll sang Department of Social Welfare and Development (DSWD) regional office.
Samtang ang nabilin naman sa kabug-usan nga 5,185 ka mga benepisyaryo ang posible makabaton sang ayuda sa masunod nga semana.
Nahibaluan nga kapin 9,000 ka mga pamilya ang ila nalista nga mga waitlisted apang nabuhinan ini bangud ang pila sa mga nalista ang nangin benepisyaryo na sang Bayanihan 1, nakakuha sang cash grant sa Department of Labor Employment (DOLE) ukon iban nga ahensya sang gobyerno nga nagahatag man sang cash grant kaangay sang Special Amelioration Program (SAP) kag mga kaupod sa balay nga nakakuha na sang ayuda.
