Ginsuguran na kaina sang aga ang pagpanagtag sang cash grant sa mga waitlisted nga beneficiaries sang emergency subsidy program sa idalom sang Bayanihan 2 ukon Bayanihan to Recover as One Act.
Ang nasambit nga mga benepisyaryo ang kwalipikado nga magbaton sang cash aid apang wala sila nalakip sa mga nahatagan sa 1st tranche kag 2nd tranche sang SAP.
Sa interview sang Bombo Radyo Bacolod kay Department of Social Services and Development head Pacita Tero, kapin 9, 000 ka mga pamilya ang ila nalista nga mga waitlisted apang nabuhinan ini bangud ang pila sa mga nalista ang nangin benepisyaryo na sang Bayanihan 1, nakakuha sang cash grant sa Department of Labor Employment (DOLE) ukon iban nga ahensya sang gobyerno nga nagahatag man sang cash grant kaangay sang Special Amelioration Program (SAP) kag mga kaupod sa balay nga nakakuha na sang ayuda.
Suno kay Tero, may yara sang kabug-usan nga 5,185 ka mga benepisyaryo apang masobra pa lang sa isa ka libo ang naupload nga payroll sang Department of Social Welfare and Development (DSWD) regional office.
Nagpangabay man ini sa iban nga hulaton nalang nga marelease ang payroll agud nga mahatag naman ang cash grant.
Kalabanan sang mga naupload nga mga payroll sang waitlisted ang nagikan sa numbered barangays samtang wala pa nadagdagan ang named barangays.
Suno kay Tero, ginpaaagi sa barangay ang pagpanatagtag sang cash grant bangud Special Disbursing Officer (SDO) ang mahatag sang cash grant.
