Nagpaathag ang alkalde sang syudad sang Talisay, Negros Occidental tuhoy sa nagalapta nga issue sa social media nga ginbalibaran sang driver sang ambulansya sang City Disaster Risk Reduction and Management Office (CDRRMO) nga madala sa ospital ang isa ka pamatan-on nga ginhapo nga residente sang Barangay Zone 6, Talisay City bangud wala sang gatong ang ambulansya gani nagtaliwan ang pasyente.
Sa interview sang Bombo Radyo Bacolod kay Mayor Niel Lizares, ginpahayag sini nga sa una na niya nga termino, ginasiguro sini nga mahatagan sang basic services ang mga Talisaynon gani naga-invest ini sang mga ambulansya agud gamiton sa tion sang emerhensya.
Suno kay Lizares, ang duha ka mga ambulansya sa City Health Office ang nakastand by bangud kinahanglan ini nga idisinfect matapos magpositibo sa COVID-19 ang driver.
Ginpahibalo man ni Lizares nga ang building sang CHO sang syudad ang nakalockdown man matapos nga may mga frontliners nga nagpositibo sa COVID-19 kag madamo ang natabo nga transmission gani temporaryo nga ginsirado agud madisinfect.
Suno diri, ginturn-over anay sa CDRRMO ang pagresponde sa tion sang emerhensya apang natabuan man nga ang tanan nga ambulansya sang CDRRMO ang gingamit sa mass testing nga ginpatigayon.
Gani wala na sang choice ang pamilya sang pasyente kundi magpangita sang masakyan agud madul-ong sa ospital ang ginahapo.
Gin-athag man ni Lizares nga sa tion nga nagakinahanglan sang ambulansya ang syudad, wala pa nakaabot ang duha nga bag-o lang ginbakal.
Suno diri, halin sa Bacolod ang bag-o nga ambulansya, naghapit sa gasoline station agud nga matughungan apang wala ini nagasolinahan bangud wala pa sang trip ticket.
Ini bangud wala pa opisyal nga naturn-over ang bag-o nga ambulansya sa syudad.
Pag-abot sang ambulansya, wala na ang pasyente bangud ginsakay na sa tricycle agud mahingagaw dala sa ospital.
Nakahangop si Lizares sa nabatyagan sang pamilya sa nagtaliwan nga pasyente kag nasakitan ini bilang isa man ka amay kag wala sini naluyagan ang natabo tuga sang sirkumstansya.
