Gin-athag sang city administrator sang Talisay City nga nagapanguna sa karun ang ciudad sa may pinakamadamo nga kaso sang coronavirus sa Negros Occidental bangud tuman ka pro-active ang ila ginapatigayon nga contact tracing kag swab testing.
Sa interview sang Bombo Radyo kay Atty. Jonathan Ealdama, ginpahayag sini nga ang pagpakigbahin sang ciudad sa “Oplan One Time, Big Time” program ukon mass testing sang probinsya ang isa sa mga rason kun ngaa madamo sang nagpositibo nga mga Talisaynon.
Suno kay Ealdama, sa apat ka mga local government units nga nakigbahin sa mass testing, ang Talisay City lang ang nakacomply kag nakalapaw sa target nga numero sang mga residente nga kinahanglan iswab.
Suno diri, sa 700 ka mga pumuluyo nga target sang kada LGU, 745 ka mga Talisaynon ang nakigbahin sa mass testing gani ila na ginalauman nga magadamo ang kaso sa ciudad.
Gindugang man sini nga ang ciudad ang nahamtang sa tupad lang sang Bacolod City kag madamo sang mga residente nga nagaubra diri gani mas prone ang mga ini sa virus.
Suno sa city administrator, agresibo man ang mga tikang sang LGU ilabi na sa pagpatigayon sang contact tracing.
Sang Domingo, ginpagkigbahin man ni Police Major Jigger Gimeno, hepe sang Talisay City Police Station nga duha ka semana na nga nagapatigayon ang ciudad sang mass testing kada Martes kag Huwebes.
Suno kay Eadalma, ila man ginanegosyar nga madugangan ang tatlo ka mga quarantine facility sa ciudad bilang preparasyon sa mga magapauli nga locally stranded individuals.
