41 ka mga kaso sang coronavirus ang narekord sa Bacolod City kahapon samtang 11 sa Negros Occidental.
Sa COVID-19 Regional Case Bulletin No. 201 nga ginpagwa sang Department of Health Western Visayas kahapon, 153 ka mga kaso sang coronavirus ang narekord sa rehiyon kun sa diin 58 ang nagikan sa Iloilo City; 41 sa Bacolod City; 24 sa Capiz; 16 sa Iloilo; kag 11 sa Negros Occidental.
Bangud diri, nagdangat na sa 14,077 ang kabug-usan nga kaso sa Western Visayas kun sa diin 3,167 ang aktibo.
Nadugangan man sang 157 ka mga recoveries ang rehiyon gani yara na ang kabug-usan nga nag-alayo sa 10,568 samtang nagsaka sa 342 ang death toll matapos magreport ang ahensya sang anum ka dugang nga fatalities.
Sa karun, may yara na sang kabug-usan nga 4,481 ka mga kaso sang COVID sa Bacolod City kun sa diin 618 ang aktibo; 3,747 ang nag-alayo; kag 116 ang nagtaliwan.
Yara naman sa 3,716 ang kabug-usan nga infections sa Negros Occidental kun sa diin 1,359 ang aktibo; 2,292 ang recoveries kag 65 ang nagkalamatay.
Samtang, nagapanguna ang ciudad sang Talisay sa may pinakamadamo nga local active cases sa probinsya halin Marso 27 tubtob Oktubre 13, 2020.
May yara ini sang narekord nga 179 ka mga aktibo nga lokal nga kaso.
Ini ang ginsundan sang ciudad sang Kabankalan nga may 136; Silay City nga may 130; La Carlota City nga may 64; Bago City kag Sipalay nga may 61; Himamaylan nga may 56; ciudad sang Victorias nga may 45; Sagay nga may 38; kag EB Magalona nga may 36.
Santo sa data, wala sang local transmission sa banwa sang Hinobaan kag kahapon, gin-anunsyar na ini nga COVID free matapos mag-ayo ang 39 ka mga pasyente nga lunsay mga locally stranded individuals kag returning overseas Filipino.
