Padayun nga nagapakig-angot ang Talisay City Police Station sa mga establishment nga may CCTV camera malapit sa puluy-an sang empleyado sang Talisay City Government nga ginluthang-patay kaina sang aga.
Sa interview sang Bombo Radyo Bacolod kay Police Major Karena Tenerife Onio, deputy chief of Police sang Talisay City Police Station, ginatinguhaan nila nga malantaw ang mga CCTV footages gikan sa barangay, mga gasoline stations, business establishments kag gikan sa mga pribado nga indibidwal nga yara sa palibot sang puluy-an sang biktima tubtob sa possible exits.
Nahibaluan nga ginluthang si Mike Lumawag, 35 anyos, nagatrabaho sa Talisay City Treasurers’ Office kag assigned sa Land Tax, kapin alas-7:00 kaina sang aga sang ini ang mag-abot gikan sa pagdul-ong sa iya 9 anyos nga bata nga babayi sa swimming lesson sini.
Una nga ginpalukpan ang salakyan sini gani siya ang nagdalagan sa sulod sang ila puluy-an, apang ginsundan ini sang suspetsado kag ginluthang sa sulod sang balay malapit sa CR.
Nakarecover sang CCTV footage ang kapulisan gikan sa kaingod nga balay nga nagapakita nga sa pag-abot sang salakyan ni Lumawag, may-ara sang nagasunod nga motorsiklo.
Paathag ni Onio nga wala pa mapat-od kun ang nagasunod sa biktima, amo ang suspetsado sa pagpangluthang kag ini ang wala man makilal-an bangod nakasuksok sang helmet.
Ginapahayag sang pamilya sang biktima nga ini ang wala man sang kaaway kag maayo man ang relasyon sini sa mga katrabaho.
Samtang nakarecover naman ang mga ini sang anom ka fired cartridges sa wala pa matumod nga armas-luthang sa crime scene.
Sa karun, ginahulat pa sang mga ini ang resulta sang postmortem examination agud matumod kun pila gid ang samad sang biktima.
