Nagapanawagan ang Talisay City Police Station sa kun sin-o man ang nakakilala sa duha ka manobyahanay nga nagbilin sang lapsag sa stepboard sang jeep sa Barangay Zone 8, Talisay City Negros Occidental sang Hunyo 8 nga magpadulong lamang sa ila estasyon.
Sa interview sang Bombo Radyo Bacolod kay Police Major Razhl Jim Jocson, deputy station commander sang Talisay City Police Station, sa CCTV nga nakuha nakita nga nagatabok ang duha kag nagsulod sa bahin sang Orient gasoline station antes ginbilin ang lapsag.
Suno kay Jocson ang lalaki nalang nakita nga nagbilin sang lapsag bangud ang babayi ang wala nag-upod sa iya.
Suno diri, kun ang duha gid man ang ginikanan sang lapsag dapat magkadto ang mga ini sa police station agud mahibaluan kun ano ang rason sang mga ini sa pagbilin sang bata kag agud man nga mahatagan ini sang maayo nga bwas-damlag.
Wala man sang mga ini gilayon ginpagwa ang mga CCTV footage bangud ginsiguro nila anay nga ang mga ini ang nagbilin sa lapsag.
Ekslusibo naman nga ginhatag sang Talisay City Police Station ang kopya sang CCTV agud nga ipanawagan kun sin-o ang nakakilala sa duha nga posible ginikanan ni Baby Girl.
Ginpahayag naman sang Punong Barangay sang Barangay Zone 8, Talisay City nga wala man sang may nakakilala sa duha sa Barangay.
Sa interview sang Bombo Radyo kay Punong Barangay Ian Glaraga, wala sang nakakilala sa duha apang may nagmuno sa mga ini nga nagapataya sang Small Town Lottery nga uyatan sang maayo ang bata kag indi pagpatun-ugan.
Ang bata sa karun ang healthy na kag yara na sa paghinakop sang shelter.
