Nagapanawagan ang mga kapulisan sang Talisay City Police Station sa mga pumuluyo nga nakakilala sa napatay nga gina-alegar suspek sa robbery incident nga natabo sa isa ka subdivision sa Barangay Zone 15, Talisay City, Negros Occidental kaina sang kaagahon, Agosto 25, 2026.
Sa interview sang Bombo Radyo Bacolod kay Police Lt. John Patrick Linda, Deputy Chief of Police for Administration sang Talisay City Police Station, nagresponde ang mga kapulisan sa Plantazionne/Asyana, Ayala North Point subdivision alas 12:50 ang takna kaina sang kaagahon matapos nga magtawag sa ila ang gwardiya nga may yara sang nadakpan nga gina-alegar mga kawatan.
Suno kay Linda, nakita sang mga police ang isa ka wala pa nakilal-an nga lalaki nga nagahapa kag wala nagagiho.
Suno diri, ginpahayag sang security guard sang nasambit nga subdivision nga nagapatigayon sila sang robing patrol sang ila namutikan ang duha ka mga wala natumod nga mga lalaki nga nagatuyo nga magsulod sa isa ka balay.
Gintinguhaan sang duha ka mga security guard nga madakpan ang duha apang ang isa ang nagpalagyo sa wala mahibaluan nga direksyon samtang ang isa ang nadakpan matapos nga ini ang makasandad.
Suno sa mga security guards sang nadakpan ang wala pa matumod nga persona nagaginhawa pa ini kag sang nag-abot ang mga kapulisan nagpangayo ang mga ini sang bulig sa City Disaster Risk Reduction Management Office sang Talisay City.
Gintsekyar ang persona kag gindeklarar sang mga ini nga wala na sang kabuhi ang nasambit nga lalaki.
Sa karun, ginahulat pa sang kapulisan ang resulta sang examination sang Scene of the Crime Operation (SOCO) agud nga matumod ang gintunaan sang kamatayon sang biktima.
