Padayon pa ang imbestigasyon sang Talisay City Police Station sa lalaki nga nanutok kag nagpalupok sang armas luthang sa Hacienda San Antonio 2, Barangay Dos Hermanas, Talisay City.
Ang lalaki ang ginkilala lamang kay Alyas Jojo ukon Alyas Cesar Castro, 68 anyos.
Ang konflikto ang nag-umpisa sa duta nga gina-agawan sang mga Comprehensive Agrarian Reform Program (CARP) Beneficiaries kag nagapakilala nga tag-iya sang propedad nga si Paul Chang.
Sa interview sang Bombo Radyo Bacolod kay Police Lt Col. Salvador Trono, may hard hat kag facemask nga suksok si Alyas Jojo kasubong man ang iban sini nga kaupod nga nagpanaya man sang armas-luthang.
Sa karun ginatun-an pa kun sila ang miyembro sang security group kag kun may lisensya sila sa paghupot sang armas.// Padayon man sa karun ang pagpangita kay Alyas Jojo kag sa mga upod sini.
Pahayag ni Trono, nalakip na sa regular patrolling sang kapulisan ang area kag nagbilin na sang contact number sa pumuluyo kun may suspicious na sa sitwasyon.
Sa karun, ang criminal complaints nga grave threat, illegal discharge of firearms kag violation sa Comelec Gun Ban pa lamang ang ila nga gintutukan batok kay Alyas Jojo.
Samtang, nagpadayon na sa pagpananom ang mga pumuluyo sa Hacienda San Antonio 2, Barangay Dos Hermanas.
Suno kay Gonsalo Lamig jr, presidente sang Hacienda San Antonio 2, nagpadayon na sila sang pananom kag wala na sila ginhilabtan pa.
Suno diri, ginatulok na lamang sila sang mga nagabantay kag ginabay-an sa ila hilikuton.
Apang, nagalaum ini nga makita na si Alyas Jojo bangod dilikado para sa ila nga may bitbit ini nga armas luthang kag nagapanago lang.
Suno pa diri, may yara sang record si Alyas Jojo nga gin-rape sini sadto ang iya bata.
