Tatlo ka bangkay ang nasapwan sa magkalapit lamang nga lugar sa ciudad sang Talisay, Negros Occidental kahapon kag lunsay wala pa matumod ang identity.
Ang una nga bangkay ang nasapwan sa Hacienda San Isidro, Barangay Concepcion, Talisay City alas-2:20 sang kaagahon.
Sa imbestigasyon sang Talisay City Police Station, may nakalabay nga motorsiklo kag tricycle sa grupo sang mga pamatan-on kag nagpahibalo nga may nakit-an sa kilid sang kakampuhan nga abandonado nga Euro Viper Man 150 nga motorsiklo nga may plate number nga 061609, kag may helmet nga nahamtang sa kilid sini.
Sa pagtsekyar sang mga pamatan-on sa area, didto nila nasapwan ang bangkay sang isa ka lalaki.
Sa interview sang Bombo Radyo Bacolod kay Police Major Rhazl Jim Jocson, Deputy Chief of Police sang Talisay City Police Station, ang una nga bangkay ang nasapwan sa Hacienda San Isidro, Barangay Concepcion, Talisay City alas-2:20 sang kaagahon.
Ang ikaduha nga bangkay ang nasapwan alas 9:00 ang takna sang aga kun sa diin ang biktima ang nagakaagnas na Hacienda Minuluan Mendoza, Barangay Matab-ang.
Ini ang nagasuksok sang blue nga shorts.
Samtang alas-2:00 kahapon sang hapon, isa naman ka bangkay ang nasapwan sa parehas nga kampo sa Hacienda San Isidro, Barangay Concepcion.
Ang biktima ang ginabanta naga-edad sang 35 tubtob 40 anyos.
Ini ang nakasuksok sang blue nga sando, maong pants, itom nga rubber shoes kag may tattoo sa iya natuo nga abaga.
May narecover man sa lugar nga yabi sang motorsiklo nga Euro Viper Man 150, helmet, isa ka kitchen knife kag itom nga sling bag nga may unod nga tools nga ginagamit sa pagkay-o sang motorsiklo.
Suno kay Jocson, ang lugar kun sa diin nasapwan ang mga bangkay ang suludlon kag indi madasig manotisyaran sang mga naglabay sa lugar apisar nga ang lugar ang indi man malayo sa access road.
Ginpahayag man sini nga ang duha nga nasapwan sa Hacienda Isidro, Barangay Concepcion ang mahimo nga kilalahay.
Ginpaidalom sa forensic examination ang mga nasapwan nga bangkay agud nga mahibaluan ang rason sang ila kamatayon.
Suno kay Jocson, nakig-angot naman ini sa mga kapulisan sa Silay City kag Bacolod City agud nga mabuligan ang pagtumod sa identity sang mga bangkay.
Suno sa Deputy Chief of Police sang Talisay City Police Station kun sin-o man ang may himata nga wala nakapauli mahimo lang makig-angot sa ila estasyon.
