Nagpanawagan ang spokesperson sang Tama Na Coalition – Negros nga updan ang patigayunon nga rally sa Domingo, Nobyembre 30.
Sa interview sang Bombo Radyo Bacolod kay former Negros Occidental Governor Rafael “Lito” Coscolluela, ang Taong Bayan Ayaw sa Magnanakaw at Abusado Network Alliance (TAMA NA) ang gintingob nga nagkalainlain nga sektor nga lunsay nagapanawagan sang accountability, transparency kag restitution sa mga imbulbado sa kurapsyon.
Lakip diri ang Council of Concerned Citizens (C3) nga naga-imbestigar sa flood control anomalies sa Bacolod City, One Negros Ecumenical Council (ONE-C) nga iya sang simbahan katoliko, non-government organizations kag nagkalainlain pa nga sektor.
Kahapon, sila ang may 7,000 na nga segurado nga maga-upod kag ginalauman nga ini ang magadangat pa sa 12,000 nga partisipante.
Suno kay Coscoluella, ang isa ka grupo ang magahalin sa South Capitol Road samtang ang isa ang gikan sa Lupit Church kag dungan nga magamartsa padulong sa plaza ala-1:30 sang hapon.
Panindugan sini nga sila ang wala sang pili kag luyag lamang manabat ang dapat manabat may kaangtanan sa flood control corruptions kaangay sa ghost, failed, substandard kag overpriced nga proyekto.
Sa Tama Na Protest Rally Against Corruption ginapanawagan man nila nga respetuhon ang konstitusyon kag indi na magtuga sang kinagamo.
Suno kay Coscolluela, ang panawagan sa destabilization, rebolusyon kag military junta ang wala sang matuga nga maayo.
Panawagan sini sa mga Negrense nga updan ang panawagan nga “Sobra Na! Tama Na! Dapat managot ang kasangkot.”
