Suspendido ang tanan nga byahe sang barko gikan kag pasulod sa Negros Island matapos mapaidalom sa Tropical Cyclone Wind Signal bangod sa Bagyo TINO.
Sa interview sang Bombo Radyo Bacolod kay Coast Guard Station Northern Negros Occidental Spokesperson Lt Jr Grade John Hofer Olis, alas-11:00 palang kagab-i may ara na sang mga nagkanselar sang byahe, apang sang ginpaidalom sa Signal No 1 ang Negros Island Region kaina sang kaagahon, automatic naman nga ginkanselar ang tanan nga byahe.
Paathag ni Olis nga sila ang nagabase sa weather forecast sang state weather bureau.
Nahibaluan nga may pila ka mga pasahero nga stranded sa pantalan ang nanindugan nga magapabilin na lamang sa area sa paglaom nga magbalik pa ang byahe kun magkanay ang tiyempo.
Apang suno kay Olis, kun lantawon ang weather forecast malayo pa nga malift ang cancellation of trips bangod magalabay gid sa Negros Island Region ang Bagyo TINO.
Pahanumdom man ni Olis sa mga pumuluyo partikular na sa mga mananagat nga likawan ang magpalawod, bangod ang mamadlos nga hangin ang sarang makatuga sang dalagkuan nga mga balod nga makapakulob sang mga sakayang pandagan.
