Ginapakamaayo sang Provincial Admnistrator sa Negros Occidental nga makita gid ang pagbuylog sang tanan nga local government unit para sa 30th Panaad sa Negros Festival.
Ang Panaad sa Negros Festival 2026 ang patigayunon humalin Abril 13 tubtob 19.
Apang kahapon ginpatigayon na ang grand launching kag sashing sang mga kandidata sa Lin-ay sang Negros 2026.
Sa interview sang Bombo Radyo Bacolod kay Atty Rayfrando Diaz, sadto yara lamang sa masobra 20 ang nagapasakop, kag first time sa maragtas sang probinsya nga kompleto nga 32 ka mga kandidata ang nagpartisipar.
Suno diri, 31 lamang kuntani ang mga kandidata kalakip na ang Bacolod City, kag ang wala na lamang sang kandidata amo ang banwa sang EB Magalona.
Gani ginlab-ot ni Negros Occidental Governor Eugenio Jose “Bong” Lacson ang alkalde sang banwa, nga gilayon man nga nagpadala sang kandidata./Partner sang Provincial Government sa Panaad sa Negros Festival 2026 ang Negrosanon Young Leaders Incorporated.
Gani madamo sa mga aktibidad ang nakafocus sa mga pamatan-on.
Nangayo man sang ila rekomendasyon ang probinsya sa mga imbetaron nga mga performance, kalakip na ang Ben&Ben, Parokya ni Edgar, Sexbomb kag iban pa.
Samtang may mga cultural activities man kalakip na an livelihood kag mental health programs.
Tanan nga LGUs ang magapartisipar man sa Best in Pavilion competition sa Panaad Park and Stadium.
Panawagan ni Diaz nga buylugan kag suportahan ang mga programa nga nakaplastar, kag nagalaom ini nga makaganar man sang maayo ang turismo kag komersyo sa subong nga tuig.
