Madinalag-on nga napatigayon kagab-i ang mass oathtaking sang tanan nga nagdalaog nga local officials sa 2023 Barangay and Sangguniang Kabataan Elections sa SMX Convention Center.
Ginpangunahan mismo ni Bacolod City Mayor Alfredo Albee Benitez ang pagpanumpa sang mga panibag-o kag re-elected officials.
Sa mensahe sang alkalde matapos ang pagpanumpa sang mga lokal nga opisyales, ginpangabay sini nga sila ang magbululigay kadungan sa pasalig nga suportado sini ang ginpili sang mga pumuluyo.
Ginpahanumdom man sini nga kaangay sa iya ginpanumpa sadto, sa iya magagikan ang bulig, samtang ang mga opisyales sa Barangay nga makabig frontliners, amo naman ang ila liyabi agud mapalab-ot sa publiko ang nagakadapat nga benepisyo.
Aminado ang alkalde nga indi makafunction sang maayo ang City Government kun wala ang suporta kag bulig sang mga Barangay officials, gani ang pagkamadinalag-on sang kada Barangay ang katumbas man sang pagmadinalag-on sang Sangguniang Panlungsod kag kabug-usan nga Bacolod City Government.
Kaangay sa plataporma sini sang nagapapili sa pwesto, liwat ginpanawagan ni Benitez sa mga local officials nga siya ang updan sa pagseguro nga mapadayun ang pagbag-o.
Panawagan sini ang “good governance”, gani dapat nga dulaon na kag pamatukan ang indi husto nga mga gawi.
Pasalig naman sini sa mga Barangay officials nga I-extent niya ang software program sang accounting office sa City Government, agud magdangat ang digitalization sa Barangay level.
Dugang pa sini nga siya ang magasuporta man sa pasilidad kag trainings nga kinahanglan sang Barangay bangod ini ang kabahin sa tikang padulong sa Super City status sang ciudad sang Bacolod.
Panawagan naman sang alkalde sa Sangguniang Kabataan, nga kaupod sa ginbatun nga gahom ang dako man nga responsibilidad.
Hingyo sini nga ipabilin ang idealism sang mnga ini kag panguyatan kun ano man ang ginapatihan.
Paathag sini nga sa pagbuligay, wala sang handom sa Barangay nga indi mahatagan sang katumanan.
