Nagpasalig ang bise-alkalde sang ciudad sang Bacolod nga nagapaidalum sa polymerase chain reaction (PCR) test ang mga Overseas Filipino Workers (OFW) antes ang mga ini papulion sa ciudad.
Sa interview sang Bombo Radyo kay Vice Mayor El Cid Familiaran, aminado ini sang nabaton nga reklamo nagikan sa mga residente nga indi pagpasudlon ang mga OFWs bangud makabig nga carrier ang mga ini.
Apang gin-athag ni Familiaran nga nagasunod ang mga ini sa protocol bangud ginapapaidalum sila sa PCR test kag indi lang rapid test.
Suno sa iya, pag-abot, gina-isolate ang mga ini sa sulod sang 14 ka adlaw kag kuhaon liwat sang swab sample.
Ginakabig man sang ciudad nga lesson learned ang duha ka mga OFWs nga nagpositibo sa probinsya gani mandatory gid nga iisolate ang mga naga-abot kag kuhaan sang test.
Ginpahayag man sini nga ginseparar na ang komunikasyon kag proseso sang pagrepatriate sang mga OFWs nga residente sang Bacolod sa mga residente sang Negros Occidental.
Sa mga nastranded naman sa ciudad nga luyag magpuli sa ila mga banwa, nagpang-abiso ini nga kinahanglan pahanugutan ini sang alkalde sang iya banwa nga magpauli didto, siguraduhon nga nakompleto ang 14 day quarantine kag may certificate sang City Health Office.
Gindugang man sini nga kun may yara man lang sang salakyan, sarang gid nga makapauli apang kinahanglan nga kompleto ang requirements.
