Gindagdagan na sang Notice to Explain ang mga empleyado sang ciudad sang Bacolod nga yara sa Treasurer’s Office matapos nga makuhaan sang alkalde sang litrato nga nagalantaw sang teleserye sa tion sang office hours.
Sa interview sang Bombo Radyo Bacolod kay City Administrator Atty. Pacifico Maghari III, ang natungdan nga opisina ang gindagdagan sang memorandum kag notice to explain.
Gilayon naman nga ginmando ang pagpahukas sang telebisyon sa tanan nga mga department sa Bacolod City Government Center.
Madumduman nga ginpost sang alkalde ang litrato sa fb page sini kag ginapahayag nga may isa ka concerned citizen nga nagpadala sang litrato sa iya talatapan kon sa diin makita nga nagalantaw sang telebisyon ang pila ka mga empleyado sang ciudad sa oras nga alas 3:00 sang hapon.
Ginremind ni Mayor Albee Benitez, ang tanan nga mga empleyado sang ila sinumpaan sa pumuluyo kag sa ciudad.
Pahayag sang alkalde, ang mga empleyado sang gobierno ang dapat nga mag-serbisyo sang insakto kag tampad para sa mga pumuluyo nga nagakinahanglan.
