Padayon pa nga ginapangita sang mga kapulisan sang Bago City Police Station ang mga suspetsado sa pagtiro-patay sa isa ka tapasero sa Purok Pukatod, Barangay Sagasa, Bago City, Negros Occidental kagab-i.
Sa interview sang Bombo Radyo Bacolod kay Police Lt. Joseph Jaro, Deputy Chief of Police sang Bago City Police Station, ginpahayag sini nga ang biktima ang ginkilala kay Raymund Pasigado Mesias, 27 anyos kag residente sang nasambit nga lugar.
Samtang, ang mga suspetsado ang ginkilala kanday Sonny Gamuyao Sr, bata sini nga si Sonny Gamuyao Jr, kag duha ka iba pa nga ginkilala kanday Rommel kag alyas Alog, apang padayon pa nga ginahibalo sang kapulisan sa Bago City Police Station ang matuod nga identity sang duha.
Suno kay Jaro, lunsay mga residente sang Barangay Central Maao ang mga suspetsado.
Suno sa deputy chief of police, Mayo 30 sang gab-i sang ginsulod sang apat ang balay ni Mesias kag gilayon nga gintiro ang biktima sang wala mahibaluan nga rason.
Ang biktima ang nag-angkon sang patal nga igo sa lawas nga gintunaan sang kamatayon sini.
Gindala pa kuntani sa ospital ang biktima apang gindeklarar ini sang attending physician nga dead on arrival.
Suno kay Jaro, ginalantaw nila nga yara sa impluwensya sang illegal nga druga ang mga suspetsado gani nahimo sang mga ini ang krimen.
Isa man sa ginalantaw nila nga kabangdanan nga naling-an ang mga suspetsado sa biktima bangud ginapahayag sang mga kasilingan sini nga nakainum ini sang makahulubog nga ilimnon kag natabuan nga yara sa atubang sang balay sang biktima ang mga suspetsado.
