Ginbawian na sang kabuhi ang 32 anyos nga tapasero sang tubo nga si Herson Subong, nga isa sa onse nga naigo sang kilat sang Mayo 17 sa Purok Concordia, Barangay Ma-ao, Bago City, Negros Occidental.
Ginkumpirmar ni Barangay Ma-ao Kagawad Joemarie Deocampo nga ginbawian sang kabuhi ang pasyente alas-3:00 kahapon sang hapon sa Corazon Locsin, Montelibano Memorial Regional Hospital (CLMMRH).
Madumduman nga ang onse ka mga tapasero sang tubo ang nagpasilong sa dalom sang truck nga ila ginakargahan bangod sa hinali nga pag-ulan.
Apang ini ang ginsundan sang pagpangilat nga aksidente nga nag-igo sa ila kag ginalantaw nga ang kuryente ang kay Subong gid naglabay.
Si Subong ang una nga gindala sa Bago City Hospital kaupod sang napulo ka iban pa, apang ini ang gintransfer sa syudad sang Bacolod bangod sa kritikal nga kondisyon.
Suno kay Deocampo, internal ukon sa sulod sang lawas ni Subong ang nakaangkon sang komplikasyon.
Dugang pa sini nga sang Lunes, gindul-ungan pa sang Barangay Ma-ao sang natipon nga financial assistance ang biktima, magluwas pa sang ginhatag sang Bago City Government.
Nahibaluan nga si Herson Subong ang agot sa pito ka mag-ululutod kag ini ang wala pa sang kaugalingon nga pamilya.
