Ginpatpat sang City Disaster Risk Reduction and Management Office ang pila ka rason sa madasig nga pagsaka sang tubig-baha sa ciudad sang Bacolod.
Sa interview sang Bombo Radyo kay Dr. Anna Maria Laarni Pornan, pinuno sang CDRRMO, madamo sang rason kun ngaa madasig ang pagbaha sa ciudad kasunod sa Bagyo Egay.
Suno diri, ang pagbunok sang ulan ang rason kun nga ginbaha ang pila ka area kaangay sang Barangay 39, Pahanocoy kag Sincang Airport.
Sa Brgy Pahanocoy, ang Pahanocoy Creek kag Cabalagnan Creek, ang nagatabo sa unhan asta nga magkadto sa baybay apang antes ini makalab-ot sa baybay malawig kag madamo sang liko-liko nga gina-agyan ang tubig.
Dugang pa nga may yara sang structure nga nagabalabag sa paglabay sang tubig ukon may yara gid man bala sang alagyan ukon wala nga makagwa ang tubig, kag ini ang ila iga-tsekyar.
Aminado man ini nga isa man sa rason amo ang drainage system sa ciudad apang ini bangod sa mga basura nga nagasulod sa drainage, apang suno kay Pornan madamo pa sang factor nga nagatuga sang pagabha sa ciudad kag kasunod sa mando ni Bacolod City Mayor Alfredo Albee Benitez, sila magakoordinar sa Department of Public Works and Highways kag City Engineers.
Handa naman ang budget para sa installation sang rain gauge kag ginhulat na lamang nga makakoordinar sa PAG-ASA.
Samtang, aminado si Pornan nga wala nag-ekspektar ang CDRRMO sa bagyo Egay kag amo nga ginkakibot ang pagbaha nga nagluntad sa ciudad.
Nagpanawagan si Pornan sa mga barangay nga magpartisipar sa training nga ila ginapatigayon kay para man ini sa ila kaayuhan nga kun may yara sang katalagman, ang barangay ang mangin una nga tagresponde.
