Nagpaandam ang Task Force Basura sang Bacolod sa mga nagahaboy sang basura sa higad sang dalan.
Sa interview sang Bombo Radyo sa pinuno sang task force nga si Wilfredo Geolingo, 10 na ka trisikad kag tricycle drivers ang nadakpan nga nagaula sang basura kag suno sa mga ini, ginsuhulan lang sila sang mga tupad-balay nga ini ang ihaboy.
Ang mga violators ang nadakpan malapit sa Bacolod Police Station 2 sa Barangay, malapit sa Panaad Park and Stadium sa Barangay Alijis, sa taytay sa Brgy. Taculing kag may yara man sa Barangay 16.
Natinluan naman ang puno sang acacia sa higad sang dalan padulong sa East Homes 4 sa Mansilingan nga nadiskubrehan man sang task force nga ginahaboyan man sang basura.
Suno kay Geolingo, gab-i tubtub kaagahon nagagwa ang mga nagahaboy kag nagalabay lang sa lugar agud nga mag-itsa sang basura gani indi mahapos ang pagdakop sa ila.
Sa una nga offense suno sa task force head, ginahatagan lang sang warning ang violator apang sa ikaduha nga offense, may yara na ini sang multa kag iga-impound pa ang ila tricycle.
Suno kay Geolingo, indi dapat paghakuton sang mga trisikad kag tricycle drivers ang basura bangud may may yara sang garbage hauler.
Nagpanugyan man ini sa mga residente nga mangin responsable kag manawag sa telepono sa numero 445-6579 kun wala nahakot ang ila basura bangud may action center ang ciudad para diri.
