Liwat nga nagpanawagan ang Task Force Disiplina sang Bacolod sa mga residente nga sundon ang minimum health protocols kag ipaiway ang pagkadto sa matawo nga mga lugar subong nga yara ang ciudad sa Alert Level 3 bangud sa pagsaka sang kaso sang COVID.
Sa interview sang Bombo Radyo kay Wilfredo Geolingo, madamo ang restrictions kun yara sa Alert Level 3 ang isa ka lugar.
Ginahulat pa sa karon ang Executive Order ni Mayor Evelio Leonardia angot sa Alert Level 3 sa Bacolod apang ginapaabot na nga dumilian ang pag-inom sa pampubliko nga lugar, videokehan, clubs, bars kag iban pa.
Antes pa ang pagtake effect sang mas mataas nga status suno kay Geolingo, nagsapol na ang Task Force Disiplina kag ginplanuhan ang paglibot sa ciudad agud mapatuman ang minimum health protocols kaangay sang pagsuksok sang face mask kag pag-obserbar sang social distancing.
Ang madakpan nga wala nagasuksok sang face mask suno kay Geolingo ang may multa nga P200.
Tsekyaron man sang task force ang mga beach agud masiguro nga wala sang mga tawo nga nagatinumpok.
Kadungan sini, nagpanawagan si Geolingo sa mga pumuluyo nga ipaiway anay ang paglagaw sa mga park agud indi na magdamo ang kaso kag makabalik sa normal ang ekonomiya.
Gin-engganyo man sini ang mga unvaccinated nga magpabakuna na agud may dugang nga proteksyon batok sa virus.
