Ginpasalig sang Task Force Disiplina nga ginahimo nila ang katungdanan agud mabuligan ang Bacolod City government nga indi magsaka ang quarantine status sang ciudad.
Nahibaluan nga daw kaangay nga under probation sa karon ang Bacolod nga ginpaidalom sa general community quarantine with heightened restrictions tubtub sa Hulyo 22 kag kun indi magnubo ang COVID cases, automatic ini nga ipasaka sa modified enhanced community quarantine sa Hulyo 23.
Sa interview sang Bombo Radyo kay Wilfredo Geolingo, team leader sang Task Force Disiplina, ginatsekyar sang task force ang mga kalan-an kag mga lugar nga ginatipunan, kun nagasuksok sang face mask kag nagadistansyahanay ang mga lamesa agud nga maobserbar ang social distancing.
Ginadumilian man ang contact sports sa idalom sang Executive Order No. 39 Series of 2021 nga gin-issue ni Bacolod City Mayor Evelio Leonardia nga nagapaidalom sa ciudad sa GCQ-HR.
Suno kay Geolingo, ginapasiguro gid sang Task Force Disiplina nga ini ang macomply.
Sa monitoring sang task force, kalabanan nga kalan-an ang nagacomply man.
Sa tion nga may makita nga nagabutang sang face mask sa sag-ang suno kay Geolingo, ginahatagan ini sang last warning bangud may yara man sang rason kun sila ang nagakaon.
Apang kun wala gid ini sang dala nga face mask, ginaisyuhan ini sang task force sang citation ticket.
Kadungan sini, nagpanawagan si Geolingo sa mga Bacolodnon nga ipaiway ang mass gathering bangud kooperasyon ang kinahanglan agud indi maupgrade ang quarantine status sang ciudad.
