Ginalauman nga magapagwa na ang Commission on Elections sang listahan sang designated areas nga butangan sang campaign posters sang lokal nga mga kandidato kadungan sang pagsugod sang local campaign period, bwas, Marso 25.
Suno kay Wilfredo Geolingo, pinuno sang Task Force Disiplina, sa karon, wala pa naghatag sang deputation ang Comelec sa Task Force Disiplina apang may gintukod si Mayor Evelio Leonardia nga team nga magabantay sa mga lugar nga ginapatahum sang city government.
Suno kay Geolingo, ginakakas ang mga campaign posters sa mga lugar nga gina-beautify sang ciudad, kalakip na ang mga poste sang kuryente kag street lights.
Ginadumilian man ang pagbutang sang campaign posters sa Bacolod Public Plaza.
Indi man pwede makatapik sang election materials sa kilid sang Negros Occidental High School kag Rizal Elementary School.
Suno kay Geolingo, madamo na ang ginkakas sa nasambit nga mga lugar bangud indiscriminate ang pagtapik sang posters ukon ribbons nga yara sa tanom.
Bangud sini, nagpanawagan si Geolingo sa mga kandidato kag mga supporters nga mangin responsable sa pagtakod sang campaign materials bangud kanugon lang ang ila gasto kun wala ini sa husto nga lugar.
Kun iclaim sang kandidato ukon supporters ang ginbaklas nga posters suno kay Geolingo, ini ang igahatag man sa ila apang sa masami, nagakagisi ang mga posters.
Nagpanugyan man ini sa mga supporters nga indi pagsampawan ang campaign posters sang iban nga kandidato.
