Gin-athag sang Task Force Disiplina sa ciudad sang Bacolod nga wala sang pinilian ang city government sa mga venue nga tinluan basta yara sa idalum sang jurisdiction sang ciudad.
Ini matapos ang ginpatigayon nga separado nga campaign rallies sang Grupo Progreso sa Bacolod Public Plaza kag Team Asenso sa Paglaum Sports Complex sang Sabado nga nagtuga sang mga basura sa venue pagkatapos sang event.
Sa interview sang Bombo Radyo kay Task Force Disiplina head Wilfredo Geolingo, lunsay natapos mga alas 11:00 sang gab-i ang mga campaign rallies kag may yara sang gin-augment nga mga street cleaners kag mga personnel sang General Services Office sa Bacolod Public Plaza nga gilayon nga nanlimpyo pagkatapos sang event.
Pagkatapos diri, nagpadulong naman sila sa bahin Paglaom Sports Complex apang indi ang mga ini makasulod sa venue bangud under na ini sa jurisdiction sang probinsya.
Nasiplatan nman sang Task Force nga madamo sang nagalapta nga mga basura sa dalan sa sagwa sang venue.
Suno sa iya, obligasyon kuntani sang Team Asenso nga limpyuhan ang area kag ibutang ang mga black bags sa sagwa sang sports complex agud makuha sang mga basurero sang IPM.
Pagkaaga suno kay Geolingo, nalimpyuhan man ang area.
Suno diri, ang city government ang wala sang pili nga area basta yara sa jurisdiction sang Bacolod, maskin ano man nga partido ang naghiwat sang event, may obligasyon gid nga maninlo.
