Mangdakop kag multahan na bwas nga adlaw ang mga pumuluyo sa ciudad sang Bacolod nga wala nagasunod sa health protocols angot sa COVID 19 kadungan sang pag-operate sang Task Force Disiplina.
Sa interview sang Bombo Radyo Bacolod kay Vice Mayor El Cid Familiaran, pinuno sang Inter-Agency Task Force- Bacolod City kag chairman sang Task Force Disiplina, ginpahayag sini nga ipatuman na bwas nga adlaw sang Task Force Disiplina ang mga City Ordinance angot sa pag-obserbar sang minimum health protocols.
Suno kay Familiaran, ang mga madakpan nga wala nagasuksok sang face mask kag wala naga-observe sang physical distancing ang may yara sang multa nga P200 kun residente sang Bacolod City kag P300 sa mga residente sang probinsya sang Negros Occidental.
Ginpahayag man ni Familiaran nga wala sang dal-on sa police station nga madakpan bangud may mga options ini nga magabayad sa Treasurer’s Office, macommunity service ukon pasakaan sang kaso sang City Legal Office.
Samtang, hulaton na lang ang executive order sang alkade angot sa pagpatuman sang community quarantine sa syudad.
