Nagahingyo ang pinuno sang Task Force Disiplina sa Bacolod City sa mga kandidato kag supporters nga magsunod sa mga health protocols kadungan sang pagsugod sang campaign period para sa national candidates subong nga adlaw.
Sa interview sang Bombo Radyo kay Wilfredo Geolingo, ginpahayag sini nga amu gihapon ang trabaho sang Task Force Displina kag padayon sila nga nagapanglibot sa mga kabarangayan agud siguruhon nga ginapatuman ang minimum health protocols.
Suno kay Geolingo, kun may mga kandidato nga magapadulong sa Bacolod kag kun kaisa indi mahibaluan ang ila schedule, pahanumduman gid ang mga ini kag ipadangat man sa mga kapulisan bangud may yara sang dispersal unit.
May yara man suno sa iya sang Director for Personnel and Records Management (DPRM) ang kapulisan nga sarang mapalipatan agud mahibaluan kun ano ang mga nagakaigo nga tikang sa campaign period.
Nagahingyo man ini sa mga pumuluyo nga magsuksok sang face mask, mag-obserbar sang social distancing kag disiplinahon ang kaugalingon agud indi maglapta ang virus.
Gindugang man sini nga magpabakuna agud mangin protektado.
