Nagpatigayon sang aerial inspection ang team sang Task Force Kanlaon kahapon sa pagtsekyar sa palibot sang Bulkan Kanlaon.
Kaupod sa aerial survey sanday Philippine Institute of Volcanology and Seismology (PHIVOLCS) Director Teresito Bacolcol, Engr. Ma. Antonia Bornas sang PHIVOLCS, Mari Andylene Quintia ang Resident Volcanologist sang DOST-PHIVOLCS Kanlaon Volcano Observatory, director sang Office of Civil Defense- Region 6 Raul Fernandez, OCD Negros Island Region director Donato Sermeno, OCD Region 7 Director Joel Erestain, Negros Oriental Provincial Disaster Risk Reduction and Management Office (PDRRMO) head Ian Tumobag, kag Negros Occidental PDRRMO head Irene Bel Ploteña.
Sa ginpatigayon nga emergency meeting kahapon, gintalakay ang pagdeklara sang State of Calamity sa probinsya sang Negros Occidental.
Subong nga adlaw, magapatigayon sang special meeting ang Sangguniang Panlalawigan sa pag-aprubar sang resolution sang declaration sang State of Calamity.
Suno kay PHIVOLCS Director Teresito Bacolcol, magagmay na lang ang narekord nga volcanic earthquakes kag ash emission sa bulkan apang, indi ini ang basehan nga mapanaog sa alert level 2 ang status.
Pahayag ni Bacolcol, posible pa nga maglupok ang bulkan kag mapasaka sa alert level 4 ang status.
Sa karun padayon pa ang monitoring sa sitwasyon kag activity sang bulkan Kanlaon.
