Bukas ang Task Force Kasanag nga magbulig sa mga benepisyaryo sang Assistance to Individuals in Crisis Situations (AICs) sa banwa sang Valladolid nga luyag magreklamo angot sa pagbuhin sa ila nabaton nga cash assistance.
Madumduman nga ginhatagan sang P5,000 cash assistance ang mga benepisyaro apang sa pagpauli nila, ginkadtoan sila sa ila nga balay kag ginbawi ang P3,000 sa rason nga ihatag ini sa mga wala nadala sa lista.
Sa interview sang Bombo Radyo kay John Chiong, dapat mahimo sang affidavit of complaint ang mga benepisyaro agud mafile ini sa Office of the Ombudsman.
Suno diri, mabulig ang Task Force Kasanag nga mapasa ang reklamo sa Office of the Ombudsma kag kun mapamatud-an, dako ini nga problema para kay Mayor Ricardo Presbitero Jr.
Suno pa diri, wala dapat sang kakulbaan ang mga tawo sa pagreklamo bangod ipaagi man ang tanan sa legal nga proseso kag ang mga pamahog sang opisyal wala sang kamatooran.
Dugang pa sini, sila sa Task Force Kasanag madamo na sang nasuspendi nga alkalde sa Pilipinas bangod sa indi insakto nga trabaho.
