Ginhangkat sang National Commander sang Task Force Kasanag ang mga persona nga nagsulong kag nagpangguba sang kudal sang ila compound sa Purok Paghigugma, Barangay Alijis, Bacolod City nga magbalik kag siya ang atubangon.
Sa interview sang Bombo Radyo Bacolod kay Dr. John Chiong, gilayon ini nga nagbalik sa Bacolod kaina sang aga matapos mabatun ang report sang iya tawo nga may duha ka pickup nga nagsulong sa ila propedad kag ginpangguba ang ila kudal.
Suno diri, isa lamang ang iya tawo nga nabilin sa Task Force Kasanag headquarters.
Ang grupo sang mga persona ang nakafacemask kag may isa lamang nga nagpakilala nga si Jim Segovia.
Suno sa iya tinawo, ginapangita siya sini, gani ginahangkat niya nga magbalik kag siya ang atubangon.
Ang nagpakilala nga lalaki ang nagapahayag nga siya ang tawo ni Bunny Peña.
Suno diri, ginpangitaan sang iya tinawo sang court order ang mga lalaki, apang wala man sang may maipakita.
Samtang ginakwestyon man ni Chiong ang kakulang sang tikang sang personnel sang Bacolod Police Station 7.
Suno diri, may pulis nga nag-abot sa area matapos gincontact sang Bombo Radyo Bacolod si Bacolod City Police Office Director Police Col. Joeresty Coronica.
Pag-abot sang pulis, ginhinun-anon lamang nila ang mga tawo, apang padayun lamang ang mga ini sa pagpangguba sang kudal.
Suno kay Chiong, bangod wala sang court order kag nagpangguba ang mga persona, may diber na ang kapulisan kuntani sa pag-aresto.
Sa baylo, kaangay nga sila ang wala ginakahadlukan sang mga nasambitan nga persona kag naghalin lamang sang makita ang patrol sang Bombo Radyo Bacolod.
Suno diri, kaangay nga mas nakugmat pa ang mga ini sa Bombo Radyo sangsa kapulisan.
Lahog pa sini nga Bombo Radyo na lamang ang iya tawagan
