Ginpahayag sang legal representative sang Task Force Kasanag nga sila ang magafile sang kaso batok sa mga opisyal sa ciudad sang Bacolod nga yara sa likod sang pagpirma sang lease contract sang SM Prime Holdings Incorporated sa Manokan Country.
Sa interview kay Atty Rick Reyes, sila ang magafile sang kaso nga Anti Graft and Corrupt Practices Act sa Office of the Ombudsman.
Ang imbulbado sa pasakaan sang kaso amo si Bacolod City Mayor Alfredo ‘Albee’ Benitez, Bacolod City Legal Officer Atty Romeo Carlos Ting Jr kag Jeffrey Lim, nga nagarepresentar sang SM Prime Holdings Inc.
Sa pihak sini, ginalantaw man nga magapasaka sang separado nga kaso si Atty Jomax Ortiz, ang legal counsel sang Manokan Vendors Association para sa Nullity of Lease Agreement sa Regional Trial Court.
Ginalantaw pa nila kun ilakip sa kasuhan nanday Ortiz sanday Councilor Al Victor Espino, ang chairperson sa Committee on Laws kag Councilor Celia Flor, chairperson sa Committee on Markets sa Sangguniang Panlungsod.
Ginakwestyon ni Reyes kun ano nga sahi sang chairperson sa Committee on Markets si Flor bangod ini ang wala man lang nagpatigayon sang public consultation kag halos wala man kwestyon sa lease agreement.
Panindugan ni Reyes nga mabakod ang ila ebidensya nga nalapas ang pila ka mga nakapagkit sa City Ordinance No. 19 sadtong 1983.
Paathag sini nga bilang cultural heritage, ginadumilian ang alteration sa structure sang Manokan Country, kag ang himuon sang SM Prime Holdings Inc. ang indi lamang alteration kundi gub-on mismo ang pasilidad kag islan sang bag-o.
Dugang pa niya nga ang Fr. Ferrero Street ang may historical heritage man, apang bisan isa ka tinaga wala gid namensyonar sa kontrata.
Suno kay Reyes, nakapagkit sa ordinansa nga extension sang Bacolod Central Market ang Manokan Country kag ini ang for public use, gani indi mahimo nga dumalahan sang pribado nga sektor.
