Karun nga opisyal nagid ang 5-years term para sa mga Barangay kag Sangguniang Kabataan Elections kasunod sang kompirmasyon sang Korte Suprema, ginpanawagan na lamang sang Task Force Kasanag sa mga pumuluyo nga magreport kag magfile sang kaso batok sa mga opisyal nga naga-abuso sa ila nga puder.
Sa interview sang Bombo Radyo Bacolod kay Dr. John Chiong, National Commander sang Task Force Kasanag, indi na makwestyon ang desisyon sang Korte Suprema bangod sila ang highest court of the land.
Apang kun sa personal lamang sini nga paglantaw, wala gid ini nagapabor sa pagsuspend sang Brgy and SK Elections para mapatuman ang 5-years term sa mga Brgy kag SK officials.
Suno diri, indi man mabasol ang mga pumuluyo nga may pagduda sa desisyon kag ginabasol ang Malacañang nga sa likod sang pagpatuman, bangod ang publiko ang ginhatagan man sang kinamatarong sa pagcriticize sa systema sang gobyerno.
Pahayag ni Chiong nga wala siya nagapabor sa term election bangod nakahibalo ini nga madamo sang mga nagapangurakot nga Barangay official.
Nagapati ini nga kun may ara man gid Punong Barangay nga makadeklarar nga corruption-free, ini ang tuman lang gid ka limitado.
Suno diri, sa pagsuspend sang eleksyon, indi mahatagan sang kahigayunan nga makaserbe ang mga luyag nga magserbe sa pumuluyo.
Panindugan niya nga sa Barangay naga-umpisa ang bata-bata system, kun sa diin sila ang wala na nagaserbisyo para sa publiko kundi para sa koneksyon sa alkalde.
Apang bangod nafinalize na ang desisyon sa 5-year terms, ginapanugyan na lamang ni Chiong nga ireport kun may makita nga kurapsyon.
Aminado ini nga malawig ang proseso, apang ang Task Force Kasanag ang nakahanda magbulig.
Dugang pa niya nga ang importante lamang nga may-ara sang ebidensya, agud madutlan ang opisyal.
Suno diri, sila ang madamo na sang napasakaan sang kaso, iban ang nasuspender na, may-ara sang ginapaidalom pa sa trial, kag may-ara sang gina-imbestigaran pa sang Office of the Ombudsman.// Dugang pa ni Chiong nga sila ang nakafile ma sang complaints batok sa 32 ka mga Kongresista, kag anom ang nadagdagan na sang resolusyon.
