Nagapanugyan ang National Commander sang Task Force Kasanag sa mga nabiktima sang ginbuhinan nga ayuda agud mabuligan nila sa pagpasaka sang kaso.
Ini kasunod sang isyu sa banwa sang Valladolid kun sa diin, gin-ako ni Mayor Ricardo Presbitero Jr. nga ginabawi nila ang P3,000 gikan sa P5,000 nga ginahatag sa mga benepisyaryo sang Assistance to Individuals In Crisis Situations (AICS) sang Department of Social Welfare and Development (DSWD).
Ini sa panindugan nga agud mahatagan man ang iban nga mga nagakinahanglan nga pumuluyo.
May-ara man sang kaangay nga mga report sa Victorias City.
Sa interview sang Bombo Radyo Bacolod kay Dr. John Chiong, indi lamang si Mayor Presbetero ang dapat manabat bangod nagapati ini nga madamo pa sang iban nga opisyal ang involved.
Gani panawagan sini sa mga luyag magfile sang complaint nga magpadulong sa ila opisina sa Barangay Alijis, Bacolod City kag ang mga ini ang buligan nila sa pagfile sang formal complaint under oath.
Ang complaint ang ipasaka sa Office of the Ombudsman, agud makapatigayon sang Motu Propio Investigation.
Suno diri, ang Ombudsman amo ang may gahom sa pagpatigayon sang imbestigasyon, nga makatumod kun sin-o pa ang may salabton magluwas sa alkalde.
Suno diri, may tatlo na ka Punong Barangay sa Region 4 nga nasampolan kag gindagdagan sang suspension kag natalana pa mangatubang sang criminal case.
Pinaagi sa pagpasaka sang kaso, ma-amat amat neutralize ang mga kurap nga opisyales sang gobyerno halin sa Barangay Level pasaka.
