Pabor ang National Commander sang Task Force Kasanag sa pag-implementar sang death penalty sa mga kurap nga opisyal sang gobyerno.
Sa interview sang Bombo Radyo Bacolod kay John Chiong, nakibot ini sang mabasahan ang nahanungod sa ginfile nga House Bill 11211 ni Zamboanga Representative Khymer Olaso ukon Death Penalty for Corruption Act.
Sa idalom sang hagna, patawan sang death penalty paagi sa firing squad ang mga mapamatud-an nga guilty nga may finality gikan sa Korte Suprema sa mga corruption-related criminal charges kaangay sang Graft sa idalom sang Anti-Graft and Corrupt Practices Act, Malversation of public funds kag Plunder.
Suno kay Chiong, maayo kun mahatagan sang katumanan ang hagna, agud makaangkon man sang kahadlok ang mga politiko nga mangurakot.
Ginakasubo sini nga sa karun, halos wala na sang kahadlok ang mga elected man ukon appointed officials sa paghimo sang katuntuhan sa gobyerno.
Suno diri, apat ka Presidente ang naglabay humalin sang natukod ang Task Force Kasanag sang 2009, wala gid gihapon maneutralize ang kurapsyon sa gobyerno.
Apang aminado ini nga bisan sa eleksyon, makita nga mismo ang mga pumuluyo ang nagabaton man sang kwarta gikan sa mga politiko.
Panawagan sini nga bisan sa nagahilapit lamang nga May 12 National kag Local Elections, tistengan sang mga pumuluyo nga indi magbatun sang suhol gikan sa mga kandidato.
Pinaagi sini, magaserbe nga tampa sa mga politiko nga ang mga Pilipino ang indi mabayaran.
Suno diri, madalom nagid katama ang korapsyon, kag ini ang nagakinahanglan na sang pagtutok.
Apang nakita man sini nga ang mahimo maigo kun mapatuman ang hagna amo mismo ang mga nagapalakat sang gobyerno partikular na ang mga nagahimo sang layi kaangay sang mga Senador kag Kongresista.
