Magabalik ang operasyon sang mga katapo sang Task Force Spaghetti Wires pagkatapos sang pagsaulog sang MassKara Festival 2024 sa ciudad sang Bacolod.
Ini matapos nga nagpatigayon sang meeting ang task force kahapon agud preparahan ang ginalauman nga pagbalik sang ila operasyon.
Suno kay Councilor Pao Sy, Chairperson on Public Works sa Sangguniang Panlungsod, ireactivate lang nila ang task force matapos nga naghagan-hagan ang operasyon bangud nangin madata ang kinawatay sang cable wires sang mga telecompany.
Suno kay Sy, alang-alang man nga mag-operate ang mga ini sa karun bangud nagapadayon ang selebrasyon sang Masskara Festival.
Dugang pa sini nga nakapreparar naman ang task force sa liwat nga pag-operate.
Natalana nga magatrabaho ang Task Force sa sulod sang apat ka adlaw sa isa ka semana kag unahon ang mga spaghetti wires sa bahin sang downtown area kag Lacson street.
Madumduman nga nagsugod ang Task Force Spaghetti Wires tinalikdan nga July 16, 2022 matapos ginpirmahan ni Bacolod City Mayor Albee Benitez ang Executive Order No. 003 nga nagamandu sang removal, clearing kag reorganizing sang tanan nga mga spaghetti wires sa mga main thoroughfares, sidewalks, streets, roads, allets kag public places sa Bacolod.
