Liwat nga gin-activate ang Task Force Spaghetti Wires sa ciudad sang Bacolod subong nga adlaw.
Ginpangunahan ni Bacolod City Councilor Pao Sy, chairperson sang committee on public works sa Sangguniang Panlungsod kaupod ang lima ka telecommunication companies, City Engineer’s Office, Bacolod Traffic Authority Office, Bacolod City Police Office sa pagpatigayon sang operasyon.
Kaina sang aga, ginpatigayon ang pagpanghipid sa mga kable humalin sa Lacson St tubtob sa Luzuriaga St tubtob sa Downtown area.
Madumduman nga nag-umpisa ang task force sang Agosto 14, 2022 tubtob sa Marso 18, 2023 kun sa diin nagdangat sa 38,116.58 kilos ang nakuha nga mga spaghetti wires.
Suno kay Bacolod City Councilor Pao Sy, chairperson sang committee on public works sa Sangguniang Panlungsod, gin-umpisahan ang pagpanglimpyo sa mga spaghetti wires santo man sa pasalig sang SP nga matapos ang Masskara Festival iga-activate ang task force.
Suno diri, madamo kag malawig ang ulubrahon para mahipid ang mga kable amo nga nagpangayo ini sang bulig sa mga telecommunication companies sa ila man nga involvement sa mga cable wires.
