Tatlo ka persona ang nadakpan sa drug buybust operation nga ginpatigayon sang Philippine Drug Enforcement Agency (PDEA) Regional Office Special Enforcement Team sa Prk. Masinadyahon, Brgy. 12, Bacolod City kahapon sang hapon.
Ang mga arestado ang ginkilala kanday Thelma Tabudlong, 48 anyos; Eduardo Tabudlong, 48 anyos; kag Jenny Cris Rupelos, 33 anyos.
Suno kay PDEA Team Leader Agent Bamboo, nakuha sa paghinakop sang mga suspetsado ang indi magnubo pito ka gramos sang illegal nga droga nga may estimated market value nga P45,000 kag ang P1,500 nga cash proceeds nagikan sa pagbaligya sang droga.
Yara naman sa duha ka semana ang surveillance nga ginhimo sang PDEA antes ginpatigayon ang buybust operation kahapon.
Ginpanginwala sang mga suspetsado nga sila ang imbulbado sa illegal nga transaksyon apang gilayon man nga ginbawi sang mag-ako nga sila ang runner sa illegal nga droga.
Nahibaluan nga si Thelma kag Eduardo Tabudlong ang residente sa lugar, samtang si Jenny Cris Rupelos naman ang resiente sa Brgy. 8 kag abyan ni Thelma.
Gin-ako sang mga ini nga nagakuha lang sila sang mga ginasugo nga magbaligya samtang gina-ginansyahan lang sang mga ini ang ginabaligya.
Wala naman ang mga ini nakahibalo kun sa diin naghalin ang illegal nga droga bangod naga-abot lang ang mga ini, kag ginatawgan lang sila agud nga magbaligya.
Samtang hugot naman nga nagapanindugan si Jenny Cris Rupelos nga wala ini nagabaligya apang nagagamit lang.
