Nagpasaka sang reklamo sa Ombudsman Visayas ang tatlo nga nagpakilala nga anay job orders sang Bacolod City Government sang tinalikdan nga administrasyon batok sa kay Vice Mayor El Cid Familiaran kag asawa sini nga si Portia.
Sa media interview kay Tessie Magbanua, nagtrabaho ini bilang job order sang Enero 1, 2019 tubtob sang Disyembre 31, 2021.
Suno sa alegasyon ni Magbanua, ginhire sila nga job order sang ciudad apang sila ang nagtrabaho sa balay sang bise alkalde sa Barangay Taculing samtang ang ciudad sang Bacolod naman ang nagahatag sa ila sang sweldo.
Suno diri, ang trabaho sini amo ang magluto kaupod ang cook sa balay sang bise alkalde kag nangin emosyonal pa ini sa pagpahayag nga indi maayo ang pagtrato sa iya sang asawa sang bise alkalde.
Suno kay Magbanua, subong lamang sila nagpangisog nga magfile sang reklamo bangud sa kahadlok kag wala pa ini sang upod.
Suno diri sang nakakita siya sang kaupod nagestoryahanay ang mga ini nga magfile sang reklamo sa Ombudsman.
Samtang sa bahin naman ni Bacolod City Vice Mayor El Cid Familiaran nga may nagpahibalo sa iya sang nasambit nga reklamo pero wala ini sang may nabaton nga ano man nga dokumento nagikan sa Ombudsman.
Suno kay Familiaran, ginakabig niya ang nasambit nga reklamo nga ‘political harrassment’ bangud wala na sang iban nga issue nga nakita nga mahimo ihaboy sa iya kag indi matuod ang alegasyon sang troll nga nagpost sang dokumento sa social media.
Suno pa sa bise alkalde nga sang 2016 antes ang piniliay ginpasakaan man ini sang reklamo nga may kaangtanan sa ila nga pwesto sa Manokan Country apang wala man ini ginsapak sang Ombudsman.
