Ginkompirmar sang provincial administrator sang Negros Occidental nga nakapauli na ang tatlo ka authorized persons outside residence nga naglapas sa Executive Order No. 20-25 sang probinsya nga nagarequire sa mga APOR nga magpaidalom sa swab test pag-abot diri sa probinsya.
Sa interview sang Bombo Radyo Bacolod kay Atty. Rayfrando Diaz, ginpahayag sini nga natalana nga ipadala subong nga adlaw sa mga airlines kag sa Civil Aviation Authority of the Philippines (CAAP) ang sulat nga nagadumili ukon naga-ban sa tatlo ka mga persona bangud sa risgo nga gindala sa ikaayong lawas sang taga-probinsya.
Ginkilala ang tatlo kanday Froilan Tungon, Jestoni Mangulabnan kag Jim Valerio nga nagsakay sa Air Asia flight sang tinalikdan nga semana.
Suno kay Diaz, nakatigayon sila nga makalusot bangud may mga papeles sila nga ginpakita nga exempted sila sa protocol sang probinsya bangud sa syudad sang Bacolod ang padulungan sang mga ini kag may nagsugat man sa ila apisar pa nga ginpilit ang mga ini sang katapo sang Provincial Health Office samtang yara sa airport nga magpaswab test.
Aminado man ini nga wala sang police nga nagabantay sadto gani naghingyo pa ini sa katapo sang NOCCPO sa idalom ni Provincial Director Police Col. Romeo Palgue nga maghot pursuit kag natigayon nga mapaswab ang apat nga personnel sang DC Aquino Land Surveying Services apang ang tatlo ang wala gid makita sa sulod sang 24 oras.
Ang tatlo ka mga APOR ang empleyado sang Pax Cable Inc. kun sa diin nakatinir sila sa Bacolod City sang apat ka adlaw antes nagpauli.
