Pilason ang apat ka persona matapos mabungguan sang motorsiklo ang tatlo ka mga call center agents nga nagatabok sa pedestrian sa Araneta Street, Barangay Singcang Airport, Bacolod City kaina pasado alas-5:00 sang kaagahon.
Ang driver sang TMX Honda nga motorsiklo ang ginkilala nga si Arlo Flores, residente sang Barangay Calumangan, Bago City samtang ang tatlo ka Business Process Outsourcing (BPO) employees ang lunsay residente sang Bago City kun sa diin si Hannah Cornel, ang residente sang Barangay Trese y Media; Airah Olitan, residente sang Barangay Taloc; kag Hagie Lapid, residente sang Barangay Lag-asan.
Ang tatlo ka biktima ang bag-o lamang nakatapos sa trabaho kag nagtabok sa pedestrian lane agud kuntani magbantay sang masakyan papauli, sang sila ang nabungguan.
Sa interview sang Bombo Radyo Bacolod kay Flores, gikan ini sa Barangay Bata, Bacolod City matapos magtambong sa birthday party kag aminado ini nga siya ang naka-inom sang makahulubog nga ilimnon.
Pahayag sini nga nakita man niya ang mga biktima apang bangod madasig ang iya padalagan, apisar nga nakaprino nalab-ot sini gihapon ang mga biktima.
Dugang pa nga nangin maulanon ang panahon kaina sang kaagahon gani basa kag madanlog ang dalan.
Si Cornel ang pinakamalala nga nahalitan, nga nabalian gid sang tiil.
Magluwas sa mga nabungguan, si Flores ang nakaangkon man sang mga samad, gani ang mga ini ang ginhingagaw man dala sa ospital.
