Nalakip ang tatlo ka couples nga anay mga rebelde sa 79 ka mga couples nga nagpakasal sa idalom sang Masaligan Mass Wedding Activity sang 79th Infantry ‘Masaligan’ Battalion sang Philippine Army.
Sa interview sang Bombo Radyo Bacolod kay Lt Col. Arnel Calaoagan, commander sang 79th IB, ini ang labing una nga mass wedding activity nga ginpasakupan sang gintingob nga couples gikan sa Philippine Army, CAFGU Active Auxillary kag mga anay rebelde.
Ang pagpakasal sang anom ka mga anay rebelde ang kabahin sang programa sang Philippine Army nga sila ang masuportahan sa dalayun nga pagbalik sa mainstream society.
Pahanumdom ni Calaoagan nga ang pagbalik sa sabak sang gobyerno sang mga miyembro sang makawala nga grupo ang wala natapos sa pagpanaog sa bukid kag pagbuya sang ila nga mga armas.
Magluwas diri, ginaproseso naman nila ang enrollment sang mga bag-o nga mga nagsungka sa Enhanced Comprehensive Local Integration Program (E-CLIP) kag amnesty program sang gobyerno.
Paathag ni Calaoagan nga kalakip sa ila nga luyag mabalik amo ang nadula nga political kag civil rights sang mga anay rebelde agud nga sila ang makapamuhi na sang matawhay kag may kalinungan.
Suno diri, humalin nakaligad nga tuig may-ara na sang 34 ka mga nagsungka nga rebelde kag may duha pa ka bag-o nga nagpabutyag nga luyag magbalik sa sabak sang gobyerno.
Natumod gikan sa mga anay rebelde nga sila ang ginapahog nga sa tion nga magsungka sa militar, sila ang kastiguhon tubtob nga mapatay samtang ang mga babayi nga rebelde ang himuslan anay antes patyon.
Apang napamatud-an sang mga ini nga wala sang kamatuoran ang mga alegasyon sa baylo, sila ang ginahatagan sang maayo nga pasilidad kag makakaon sang tatlo ka beses sa isa ka adlaw indi kaangay sang sila ang yara sa kabukiran.
