Ginapaidalom pa sa psychological evaluation ang tatlo ka dalagita sa isa ka High School sa ciudad sang Bacolod kasunod sang reklamo nga sila ang ginmolestiyahan sang isa ka manunudlo.
Sa interview sang Bombo Radyo Bacolod kay Police Lt. Rowena Jean Magan, spokesperson ni Bacolod City Police Office Director Police Col. Joeresty Coronica, nagapatigayon naman sang imbestigasyon ang mga kapulisan agud matumod ang kamatuoran sang reklamo, matapos magdangop sa ila ang tatlo ka Grade 8 student.
Sa karun ginahulat pa ang resulta sa ginapatigayon nga psychological evaluation, kag kun may makita nga probable cause, mahimo na nga mapasaka ang kaso.
Sa alegasyon, ang ila subject teacher nga lalaki ang nagatandog sang ila nga abaga, kag may tion man nga sila ang ginsaga-iran sini sang iya kinatawo sa likod.
Gina-alegar man nga isa sa mga kabataan ang anay ginhambalan man sang 53 anyos nga manunudlo nga anggid sa iya nga ex.
Bangod sila ang wala na manamian sa aktwasyon sang manunudlo, gani sila ang nagdangop na sa Women and Children Protection Desk (WCPD) sang BCPO.
Ang insidente ang ginapahayag natabo sang bulan pa sang Setyembre.
Samtang ginalantaw ni Magan nga ang Administrative case ukon ano paman nga sanction nga mahimo idagdag sang eskwelahan, ang himuon kun may-ara na nga mafile nga kaso ang kapulisan.
Suno diri, ini ang una nga nafile nga complaint batok sa nasambitan nga manunudlo.
