Nagsungka na ang pila ka kaupod sang bank accountant nga nagtiro sa suldado sa To-Lips Bar sa Lacson Extension, Barangay Singcang Airport, Bacolod City kahapon sang kaagahon.
Madumduman nga napatay si Private First Class Edmark Iwayan matapos nagluntad ang komosyon nga nag-ugat sa last bottle order nga ginbalibaran sang tag-iya nga si Joebert Visem nga abyan ni Iwayan samtang tatlo ka iban pa ang pilason kalakip na si Visem.
Suno kay Police Major Joery Puerto, tatlo ka lalaki ang nagsungka kaina sang aga kag ginahulat pa ang duha.
Suno kay Puerto, pito tanan sanday Ulyssis Carampatana nga nagpadulong sa To-Lips Bar kahapon sang kaagahon apang wala pa nakumbinsi ang duha ka iban pa nga magsungka.
Suno sa station commander, duha ang nagapuyo sa Barangay Sum-ag samtang ang isa naman ang ginsugat sa SM City Mall.
Nagbalibad si Puerto nga hingadlan ang tatlo apang iya ginpasalig nga may mga statement ang tatlo nga naga-corroborate sa statement ni Joseph John Magahum nga confined sa karon sa Corazon Locsin Montelibano Memorial Regional Hospital matapos nga naigo sa tiil.
Suno sa tatlo, wala sa ila ang .9mm caliber pistol nga gingamit ni Carampatana.
Suno kay Puerto, duha ka manghod sang isa nga nagsungka kaina sang udto ang nabilin nga duha gani ginaengganyo nila ang utod nga ara subong sa Bacolod Police Station 8 nga kumbinsihon ang iya duha ka manghod nga magsungka na kag dal-on ang armas-luthang.
Ang tatlo ka kaupod ni Carampatana ang yara sa karon sa Bacolod Police Station 8 kag himuon sila nga witness sa kaso samtang ang nabilin naman nga duha ang ilakip sang mga pulis bilang accomplice kun indi sila magsungka.
May isa naman nagikan sa tatlo nga naggrapple kay Private First Class Joebert Villagracia nga nagresulta sa pagkalipong sang suldado.
Suno sa station commander, ihanda nila ang kaso batok sa isa ka suspetsado kun desidido si Villagracia nga magfile sang kaso nga physical injury batok sa iya.
Sa karon, wala pa napaidalom sa paraffin test si Carampatana bangud magadepende pa sa abugado niya kun pahanugutan sini ang iya kliyente nga magpaidalom sa paraffin test.
Suno kay Puerto, naghingyo sila nga ipaidalom si Carampatana sa paraffin test apang ginahulat pa ang desisyon sang legal counsel.
Aminado ang station commander nga dugang kuntani nga ebidensya kun mapaidalom si Carampatana sa paraffin test bangud scientific evidence ini.
Ginalantaw naman ni Puerto nga si Carampatana ang una nga nagpalupok bangud nag-uy-oy lang si Iwayan samtang makusog naman ang pwersa sang caliber .45 pistol nga armas sang suldado.
